Submitted Poems in Tagalog – 3 Maikling Tula

Digma ng Buhay, Blasting, Dangal - Mga Tula ni Julyhet Roque

Mga Maiikling Tula sa Malayang Taludturan



DIGMA NG BUHAY
ni: Julyhet Roque

Dapat
Isaalang alang
Ginintuang buhay
Mahalin at igalang
Alay ng Maykapal
Ngayon ay pinipigilan ng
Gobyernong gustong yumaman
Batas ng ibang bansa
Ugat daw ng pag-unlad
Huwag hayaang RH bill ay ma
Aprobahan Kay
Yahweh tayo ay mahiya naman.

BLASTING
ni: Julyhet Roque

Buhay alagaan
Lalang ng Maykapal
Ating pagyamanin
Silungan ay bigyan.
Tinig nila'y pakinggan
Imbing tinig ay damayan
Ngalay na kamay sa hirap ay
Gabayan at sa Diyos ilapit natin
at huwag namang PASABUGIN.

DANGAL
ni: Julyhet Roque

Araw araw dapat, Mabuti ang gawin,
Baka kasi bukas, Buhay mo na’y kunin
Mainam na ikaw ay nakapagtanim ng mabuti
Sa kapwa at Diyos natin.

Mainam ng wala kang kayamanan
Sa mundong ito pag tayo’y lumisan
Pagkat mainam ng dangal ay naalagaan,
Kahit patay na, tiyak ika’y papupurihan.

Submitted Poems in Tagalog – 3 Maikling Tula

Iba pang tula Ni Julyhet Roque:

Buhay, Saan ka Patungo - Tula tungkol sa buhay
Magpatuloy →

Mga Tula sa Youtube

Gusto ko lamang bigyang-halaga ang mga batang bumigkas ng aking mga pinaghirapan. Maraming salamat sa inyo sa pagpapahalaga sa mga tagalog na tula.

Si Mikaela Kireina L. Judilla - binigkas ang tulang Palakasin Mo.



Si Althea Denisse - binigkas rin ang tulang Palakasin Mo.



Ang mga mag-aaral sa SBC Rizal. Ginawa nilang sabayang pagbigkas ang tulang Palakasin Mo.



Maraming salamat sa inyo!
Magpatuloy →

Mga Idyoma sa Tagalog – Unang Bahagi

Mga Halimbawa ng Idyoma sa Tagalog na Ginagamit sa Tula

Idyoma Bilang 1:
nagsusunog ng kilay

nagusunog ng kilay
nagsusunog ng kilay

Literal na kahulugan ng “nagsusunog ng kilay”:
nag-aaral ng mabuti

Pinanggalingan:
Noong panahon na hindi pa uso ang mga de-kuryenteng ilaw tulad ng mga bumbilya at fluorescent lights sa mga tahanan, ang mga tao, partikular na ang mga bata, ay gumagamit lamang ng mga gasera (o kandila at lampara) kapag sila’y nag-aaral o kaya nama’y gagawa ng kanilang mga takdang-aralin. At dahil ang mga gasera, kandila at lamparang ito ay nakapagbibigay lamang ng ilaw sa pamamagitan ng kani-kanilang apoy, dapat na lumapit ng lubos sa gasera ang bata upang mas maliwanag ang tanglaw na kanyang mapakinabangan. Dahil dito, nakikini-kinitang tila nagsusunog ng kilay ang isang bata kung siya’y nag-aaral na malapit sa gasera at anyong nakatungo sa apoy ng ilawan. Dito nagkabuhay ang idyoma na tagalog na nagsusunog ng kilay.

Halimbawa ng paggamit ng idyoma sa pangungusap:
1. Nagsusunog ng kilay ang batang ito sapagkat nais niyang hanguin sa kahirapan ang kanyang pamilya.
2. “Walang kahihinatnan ang iyong kinabukasan!”, sigaw ng kanyang ama. “Bakit hindi mo subukang magsunog ng kilay hanggang ikaw ay bata pa.”

Halimbawa ng paggamit ng idyoma sa Tula:

Ang mga pangarap na nais abutin,
Mahahawakan mo’t kayang sungkitin,
Magsunog ng kilay sa gabing madilim,
At gawin ang lahat ng takdang-aralin.

Katumbas sa English – Idiomatic expression:
“burning the midnight oil”

Photo Credit: http://adoptemedia.multiply.com/journal/item/7/Rodericks-Journey...

Idyoma Bilang 2:
ligaw-tingin

Literal na Kahulugan ng “ligaw-tingin”:
hindi maipahayag ang tunay na damdamin sa nililigawang dalaga, dungo, torpe, hindi nagsasabi ng nasasaloob,

Pinanggalingan:
Sa larangan ng pag-ibig, nararapat lamang na magkaroon ng matimyas na pahayag ng dakilang layunin ang isang baguntao (binata) sa kanyang napupusuang dilag (dalaga). Ito ang estado kung saan nanunuyo (nanliligaw) ang binata sa kanyang naiibigan. At sa takdang panahon na maipahayag na niya ang kanyang saloobin, maaaring magbunga ito ng pagsagot ng OO ng dalaga. Subalit, ang mga binatang hindi maipaabot nang tunay ang kanilang nararamdamang pag-ibig sa nililiyag, matatawag itong “lumiligaw lamang sa pamamagitan ng tingin” o “ligaw-tingin”. Pasulyap-sulyap lamang at hindi makalapit upang maibulalas ang kanyang tunay na pag-ibig sa dalagang nais na makatuluyan.

Halimbawa ng paggamit ng idyoma sa pangungusap:
1. Paano ka makapag-aasawa, hanggang ngayon ay ligaw-tingin lamang ang iyong nalalaman?

Halimbawa ng paggamit ng idyoma sa Tula:

Ang dalagang liyag ng puso mo’t dibdib
Iyong pagtapatan ng luksong pag-ibig,
Hindi makukuha ang oong matamis,
Kung ligaw tingin lang ang ‘yong ihahatid!

Katumbas sa English – Idiomatic expression:
cannot spit it out

Kung naghahanap ng iba pang Tagalog na idyoma / idioma, Filipino Idiomatic expressions o sawikaing Tagalog, bisitahin ang iba pang pahina: Listahan ng Idyoma.
Magpatuloy →

Submitted Filipino Poem: Buhay Saan ka Patungo

Halimbawa ng Tulang Tagalog na Tungkol sa Buhay ng Tao

Buhay nga ba natin ay saan patungo?

kalsada ng buhay
Saan Patungo?

Buhay, Saan ka Patungo?
ni: Julyhet Roque

Tao ba’y nilikha upang parusahan?
Nang mga taong angat ng konting karunungan,
Kung kaya’t pati Diyos ay nais pangunahan
At paglikha ng buhay ay nais pakialaman.

Tao gumising sa pagkakatulog,,
Harapin ang buhay at huwag mabagot.
Hanapin ang sagot sa problemang sangkot
Hingin at yakapin ang gabay ng Diyos.

Buhay nga ba natin ay saan patungo?
Pabagu-bago at ang gulo gulo.
At kung minsan talagang nakalilito
Kapag di nakaya ng ulirat nito, tao’y nauuwi sa pagkaluko-luko.

Diyos ko ang gabay mo lagi sana’y hingin
Nang sinumang taong ang tanging layunin
Mapaunlad ang buhay na angkin
Makapaglingkod din sa kapwang ginigiliw.

Masarap daw magbigay lalo’t nasasaktan
Ang bulsa ng pobreng sa yaman din ay salat.
Anumang biyaya ang ating matanggap
Ibahagi nati’t sa iba’y ikalat.

Mga kalamidad ngayo’y dumarating
Lalong lumalala at nakakakitil
Lalo’t hindi handa itong aping alipin
Tiyak mawawala pati buhay na angkin.

Anuman , saan man tayo patutungo?
Alalahanin natin na may Diyos tayo…
Handa laging tumulong at ika’y itayo
Sa lugmok na buhay na tinataglay mo.

Submitted Filipino Poem: Buhay, Saan ka Patungo ni Julyhet Roque
Magpatuloy →

Tula Tungkol sa Buhay

Halimbawa ng Tradisyunal na Tula sa Tagalog

Ang buhay ay batbat ng mga masasamang elemento. Survival of the fittest, ‘ika nga. Kapag mahina ka, kawawa ka.

Mabangis ang buhay sa mga mahihina.

Sa Pakikibaka
ni: Avon Adarna

Kinagat ng ipis si Indong Lasenggo
Namaga’t namukol sa tuktok ng nguso,
Ang salaring ipis: lumipad-dumapo,
Sa gilid ng manok ang hantong na dako.

Agad na tinuka ng manok na tandang,
Ang ipis – nagwakas sa kalam na tiyan,
At tumingala pa sa langit-langitan,
Na wari’y sumamba sa Kapangyarihan.

Ang tandang na manok, nagkisap ang mata,
Sinila ng kuko ng isang agila,
Ang habag na tandang ay naging pansigla
Sa mga inakay sa pugad sa sanga.

Kamalas-malasan ng ibong maliit,
Nabali ang sanga’t nahulog ang bagwis*,
Sa harap ng asong hayok at malupit ,
At dagling nilapa ang leeg ng pipit.

Nang aso’y dumaan sa harap ni Indo,
Walang alinlangang ang ulo’y pinalo,
Handusay* ang asong may tagas ng dugo,
At isang iglap lang ay naging adobo.

Si Indong Lasenggo ay nakaganti na,
Sa nagpesteng ipis, kumagat sa kanya,
Sadyang itong buhay may batas na dala
Ganti-ganti lamang sa pakikibaka.

-mga tagalog na tula

Kahulugan ng mga salita:

*bagwis – pakpak, bahagi ng katawan ng ibon o insekto na ginagamit sa paglipad.

Halimbawa:
Nabali ang bagwis ng tutubing karayom nang kanyang dakmain.
Mabuti pang panatilihing nakatikom ang bagwis habang bata pa kaysa lumipad kahit hindi pa kaya.
Ang tula ay nakalilipad, ito’y nakararating sa iyo kahit na walang bagwis.

*handusay – lupasay, timbuwang, napahiga, lugapi

Halimbawa:
Nakahandusay si Tandang Simeon nang madatnan ng kanyang asawa.
Ang mga tagalog na tula ay mahahandusay na lamang ba dahil sa teknolohiya?

Maaaring basahin din ang iba pang tula:

Sila ang Aking Bayani Tula Para sa mga Guro
Ang Habilin ni AmaIsang Tula na may Labindalawang 12 Pantig
Magpatuloy →

Haiku sa Filipino

Tagalog Haiku

Ang haiku ay paghahatid ng iyong mga kalooban sa labas ng daigdig. 

Ang haiku ay kasama mo sa araw-araw.

5 Halimbawa ng mga Tagalog Haiku
ni: Avon Adarna

HINDI BULAG
Ang puso’t dibdib
Malagkit kung tumitig
Kung umiibig

TAMEME
Lipad sa ulap
Na sa wari’y kaysarap,
Kapag kaharap.

MOVING ON
Luhang natuyo
Ng sinaktang pagsuyo,
Kusang naglaho.

HANGGANG
Madaling-araw,
Gising kang tinatanaw,
Hanggang pumanaw.

KAHIT GISING
Panaginip ka
Kahit na sa umaga,
Ika’y ligaya.

-mga tagalog na tula

Tungkol sa Haiku

Ang haiku ay isang porma ng tula na may sukat 5-7-5 na pantig (syllables) at maaaring may tugma (rhyme)o wala.

Li/pad/ sa /u/lap = 5
Na/ sa/ wa/ri’y /kay/sa/rap, = 7
Ka/pag /ka/ha/rap. = 5

Ang Tagalog haiku ay uri ng tula na naglalayong pumukaw ng ating mga kamalayan upang lubusan nating malaman at makita ang ating kapaligiran. Sa maikling tula na ito, naipakikita ng makata ang isang diwa na gumagawa ng tulay upang marating ang mga nagbabasa at maihatid ang wika ng kanyang puso.

Ito ay nagsimula sa bansang Japan at inampon ng Pilipinas upang maging bahagi ng ating panulaan at kultura. Naglalaman ito ng iba’t ibang kaisipan katulad ng mga diwa ng pag-ibig, panalangin, pangyayari, buhay, tao, hayop o lugar. Sa anu’t anuman, ang tulang haiku ay isang magandang pagbibigay ng halimbawa sa mayaman nating literatura at tradisyon na ang iba ay nag-ugat sa mga bansang sumakop sa atin.

Malapit sa puso ng mga Hapones, ang haiku ay tulang malapit rin sa puso nating mga Filipino sapagkat ito ay nag-uugat din sa mundong ating ginagalawan, sa ating mga kalooban at sa ating pag-iral mula pa noong unang panahon.
Magpatuloy →

Followers

Mabuhay! Welcome to "Mga Tagalog na Tula sa Pilipinas | Filipino Poems in the Philippines! Here in this blog, you will find a collection of original tagalog poems. Please, feel free to browse at our archive. Thank you! -avonadarna

Blog Archive