Mga Tagalog na Tula sa Pilipinas

Example ng Tulang may Sukat at Tugma

2011-09-22T11:57:00.001+08:00

Nalimot na Kultura ng Filipino / Tulang Tagalog

Ipinagpalit Mo
ni: Avon Adarna

Ako si Luneta na ipinagpalit mo,
Doon sa Trinoma sa gitna ng barrio,
Ang aking kariktan at taglay na bango,
Inayawan mo’t nilimot ng husto!

Ako si Taguan sa bilog na buwan,
Na noon ay laging pinaglalaruan
Ngayo’y ibinaon at nakalimutan
Telenovela ang pinahalagahan.

Kami naman itong si PO at OPO,
Na nalimot mo ring sira ang pangako,
Sa wari’y nagbaon sa ilang na dulo,
At wala nang irog na isinasapuso.

Pagmamano akong wala nang halaga,
Sa kamay at noo ng bata’t matanda,
Kung paggalang naman ang bihag na dala,
Wala akong puwang sa puso at diwa.

Tradisyo’t kultura nitong Filipino,
Ay tila kasamang nawala sa uso
Ng literatura ng mga ninuno,
At ipinagpalit mo sa kinang ng bago!

Photo Credit: Wikipilipinas

Tulang Tagalog

2011-09-22T10:45:00.000+08:00

Isang Tulang Tagalog Tungkol sa Panahon

Laging Pana-panahon
ni: Avon Adarna

Umuusok ang lupa,
Umaso’t, nagbabaga,
Bumibirit ang liyab,
Muntik na ngang magsilab!

Ang araw’y naglalatang,
Harapan ay buyangyang
Saka nakapamaywang,
Nakanguso't mayabang!

Nag-alsa ang ligamgam,
Bumabangong mainam,
Ang hanap ay kalaban,
Sa mundo ng kawalan…

Isasaboy ang init
At pawis na malagkit
Na tila isang pagkit,
Sa balat - kumakapit!

Tameme lang ang ulan,
Ayaw munang lumaban
Ayaw mabilaukan,
Sa silab na initan…

Hintay muna ng tugma
Maglaro ng gunita
Saka punta sa gitna,
Ilabas na ang handa.

Pagkat talo ang alab,
Kung hindi pa sasalag,
Hintayin na tumalab
Saka na lang pumalag.

Umulan sana bukas…
Panalangin ng pantas
Ganyan nga ang paglutas
Sa pagpapakataas!

Luha ng ulan doon,
Na nagbuhat sa Poon,
Layang gaya ng ibon
Sadyang pana-panahon…

Laging pana-panahon!

Iba pang Tulang Tagalog: Mga Tanaga ng mga Filipino

Mga Gintong Kaisipan sa Florante at Laura

2011-09-21T14:47:00.000+08:00

Mga Talata mula sa Florante at Laura ni Francisco Balagtas na Kapupulutan ng Aral

1
Datapwat sino ang tatarok kaya
Sa mahal mong lihim, Diyos na Dakila
Walang mangyayari sa balat ng lupa
Di may kagalingang iyong ninanasa.

2
O, pagsintang labis na makapangyarihan
Sampung mag-aama’y iyong nasasaklaw
Pag ikaw ang nasok sa puso ninuman
Hahamaking lahat masunod ka lamang.

3
At yuyurakan na ang lalong dakila,
Bait katuwira’y ipanganganyaya
Buong katungkula’y wawaling-bahala
Sampu ng hininga’y ipauubaya.

4
Bihirang balita’y magtapat
Kung magkatotoo ma’y marami ang dagdag.

5
At saka madalas ilala ng tapang
Ay ang guniguning takot ng kalaban
Ang isang gererong palaring magdiwang
Mababalita na at pangingilagan.

6
Na kung maliligo’y sa tubig aagap
Nang di abutan ng tabsing sa dagat.

7
Sapagkat ang mundo’y bayan ng hinagpis
Mamamaya’y sukat tibayan ng dibdib
Lumaki sa tuwa’y walang pagtitiis
Anong ilalaban sa dahas ng sakit?

Sinipi at hinango mula sa orihinal na akda ng makata na si Francisco Balagtas Baltazar na Florante at Laura.

Tugmaan Tungkol sa Pagsuway sa Batas Trapiko

2011-09-20T16:34:00.000+08:00

Sadya bang Matigas ang Ulo ng Mga Filipino?

May Namatay na Dito
ni: Avon Adarna

Maraming namatay at nasagasaan,
Sa daang may birit ng mga sasakyan,
Hindi ba binasa o naunawaan,
Sulat na may sabing 'di naman tawiran?

Sadya bang matigas itong iyong bungo?
Kaya itong batas ay ‘di sinisino,
Huwag naman sanang nagpapakagago,
‘Pagkat hindi ganyan itong Filipino!

Kapag sinabi bang dito mo ilagay,
Sa kabila ang pilit na itutugaygay?
Kapag hinihiling ang dapat na bagay,
Baliktad ang siyang iyong ibibigay?

Gawin nating dakila ang hangaring mat'wid
Huwag nating haluan ng gawa nitong paslit,
Na ang gusto niya'y siyang ipipilit,
At aasahan na tagumpay ay makamit.

Nakapanghihinayang ang mga pangarap,
Na 'di naman yata sadyang matutupad,
Kahit na ang bukas na ibig sumagad,
Mararating ba ng lubos at sukat?

Kaya ang nagbasa nitong karatula,
Siyang nakaligtas sa sagasang sakuna,
Mainam na alam ang dapat na gawa,
Nang hindi matulog nang ‘di humihinga!

Other Filipino Poems:

• Ang Tula ng Walang Letter A
• Malayang Taludturan

Isang Tagalog na Tula sa Malayang Taludturan

2011-08-28T21:33:00.000+08:00

Kailan Ngingiti ang Buwan
ni: Avon Adarna

(Isang Tulang Malaya)

Nakatanaw ang buwan
Sa kawalan
At nagmamasid
Sa palag ng kasamaan
Nitong daigdig,
At napapailing
Sa ilap ng buting nilalang,
Hindi matagpuan
Sa tumpok
Ang mga puting tupa,
Puro sungay ng kambing
Ang nakakapiling
At nakakatalik
Kaya nga napapapikit
Sa hibik
Ang langit!

Nagtapon ng titig
Ang buwan
Sa kawalan,
Hanggang sa walang hanggan
At napaigtad,
Sa nasaksihan,
Pagkat ang mga pag-asa ng bayan
Na kailangan at dapat
Na tugma at sukat
Hayun sa sulok,
At nabubulok!
Hindi makabawi,
Sa pagkalugami
At sa pagsisisi,
Sapagkat nalango
Sa bisyo ay gumon
Na sukat ipagwalang-bahala
Kahapon, bukas at ngayon!

Kailan mangyayari,
Na ang buwan
Ay ngingiti,
Habang tanaw sa gabi,
Ang kapatagan
At kabundukan
Na uhaw sa mabuti?
At kailan mapapawi
Ang lungkot,
Na ayaw kaakbay
Sa igting ng lumbay?
Kailan mapapatango
Ang buwan at magsasabi
Na tunay na mabuti
Ang nilalang
Sapagkat sadyang kawangis
Ng Dakilang Lumalang!

Halakhak lamang sana
Ng buwan
Ang pumailanlang
Sa dilim at lamig
Ng daigdig
Upang pumintig,
Hindi isumpa
Ni Bathala
At pakinggan
Ang bawat dasal
Na umiiral.
At napakainam
Na ang lahat
Ay hindi salat
Sapagkat
Buhay at gumagalaw,
Maligaya't sumasayaw!

Tulang Tagalog sa Malayang Taludturan

Example of Tagalog Poem

2011-08-28T20:24:00.000+08:00

Sample of Filipino Poem

Regalo
ni: Avon Adarna

Ang pokpok sa Cubao,
Wala pang mens nang ibugaw,
Nagpadausdos muna
Ng mamahaling pataranta,
Sa butas-butas na bituka,
Upang makabuwelo,
Sa nakangusong impiyerno.

Isang meyor ang parukyano,
Hudas na halik ang regalo.

Ang kawawang bata,
Pinahiga sa kama
Ilang ulit nagpasasa,
Ang halay at pagnanasa.

Nabilaukan,
Nahirinan,
Namuwalan,
Itong lalamunan.

Pinasok ang bataan,
Kulang ang pwersang nakalaan,
Walang nagawa, wala…
Kundi yakapin ang luha!

Hating-gabi na
Nang makipagkita siya
Sa may sungay at buntot
Na walang hininga!

Dusang hagupit
Ang tanging lumapit,
Wala bang kapit
Sa itaas ng langit?

Kinabukasan,
Sa diyaryo na nalaman,
Ng pamilya’t kaibigan,
Ang sinapit na kapalaran
Ng kawawang nilalang!

Maski mga pulis
na matutulis
at naka-uniporme
Ay hindi nakadiskarte,
Namantikaan na kasi
Ng letsong kawali!

Walanghiyang kamag-anak,
Hayop na talamak,
Baryang suhol ay tinanggap
Areglo ang kasangkap.

Inilibing ang kawawa,
Inihimlay na sa lupa,
Lumapit ang bulate.
(Ang kawawang bata)
Kahit sa kabilang buhay ay api!

Nasaan ang katarungan?
Nasaan ang kaliwanagan?
Nasaan ang pangako
Ng nakakurbata’t tsaleko?

Ang pokpok
Pinili ang buhay na magapok
Pero kung may ibang luklok
Sasapitin ba’ng matupok?

Tsk… tsk… tsk…

Alipin pa rin sa sariling bayan.
At kahit saan:
Kahit doon sa libingan
Kahit doon sa kawalan!

Submitted Poem - Tula Tungkol sa Buwan ng Wika

2011-08-27T20:15:00.001+08:00

WIKANG FILIPINO
ni Marvin Ric Mendoza

Ito ay punyal na ubod ng talim
Punyal na kumikinang sa gabing madilim
Ang puluhan nito ay utak na magaling
At ang talas nito’y kakaiba kung limiin.

Sa nakaraa’t sa ngayo’y patuloy na hinahasa
Na ang gamit ay kaydaming mga dila
Ang punyal na kaytagal nang ginawang pananda
Ay may bakas na rin ng kalawang at dagta.

Ang punyal na ito ay ang wikang Filipino
Na patuloy na umuunlad sa pag-ikot ng mundo
Ang kapara nito’y matigas na bato
Na ‘pag di ipukol ay di malaman kung ano.

Mula sa isang bibig ay kumalat nang kumalat
Mangyari’y dala-dala ng bapor na laging naglalayag
Ang wikang Filipino’y katulad ng kamandag ng ahas
Na sa isang sarili ay nagpapalakas.

Ang wika sa malayo ay kakaiba sa narito
Iba ang sa kanya, iba rin ang sa iyo
At dahil tayo ay kapwa Pilipino
Yakapin natin ang wikang Filipino.

Ang wikang Filipino ay ilaw ng Pilipinas
Liwanag sa pagtahak sa tuwid na landas
Gamitin natin at gawing lakas
At gawin ding pananggol sa darating na bukas.

Madaling magkaisa kung may pagkakaunawaan
Madaling makakita kung may liwanag na natatanaw
Medaling mananggol kung may lakas na taglay.
Sa lahat ng ito’y wikang Filipino ang daan.

Sa bukas na darating ay ating mamamalas
Ang dating ilaw ngunit bago nang landas
Maaaring paabante, maaaring paatras
Maaaring pababa, maaaring pataas.

Ang wikang Filipino’y magsisilbing gabay
Sa kayraming taong sa Pilipinas namamahay..
Sa tuwid na landas ay walang mawawalay
Kung tayo’y hawak-kamay sa pag-abot sa tagumpay…

(ang tulang ito ay sarili kong katha na aking iniaalay sa pagdiriwang ng Buwan ng Wika)

Submitted Poem – Karalitaan

2011-08-12T21:01:00.000+08:00

Tula Tungkol sa Kahirapan / Mahihirap

Karalitaan
ni: Marvin ric Mendoza

Sa bukid na tigang ay naroo't nag-iisip
ang isang taong sa hirap lamang nagtitiis.
Kung may katiting na gintong sana'y naisukbit,
ang lungkot na nadama'y sa saya ipagpalit.

Ang kahapo'y binalikang puno ng pangarap,
ang katiwasayan ay nais sanang malasap;
Ngunit dahil doon sa maling hagdan umakyat,
sa halip na riwasa'y sa dalita naharap.

Ang buhay na natamo'y lubhang pinagsisihan,
'pagkat bagabag sa puso'y laging nananahan.
Naisip pa man ding ng langit ay niyurakan
at pilit na pinahalik doon sa putikan.

Ang buhay nga sa mundo ay tunay na baligho,
parang gatas na matamis na naging maanggo.
Ubod-bait man, dalita yaong natatamo,
ubod-tibay pa ngang pisi, dagling napupugto.

Ang dumi sa mundong ngayo'y naglipana,
isipin man at hindi ay Diyos din ang may gawa,
Ang mga magnanakaw at sinungaling pa nga
ay 'di maitatatwang may silbi rin sa madla.

Ang dungis sa mukhang makikita lang sa dukha
ay tunay ngang may silbi at merong nagagawa.
Isipin mo kung wala kang dungis na makikita,
ang mga mariwasa'y tulad sa maralita.

Maraming nagsasabing ang Diyos daw ay maraya
'pagkat nakagapang lamang sila sa dalita
At ang mga katiting na yamang inaruga,
sa isang kisap-mata ay biglang nawawala.

Marami-rami na rin ang pating sa katihan
at babaeng marumi ang dangal at katawan.
Sa pag-ikot ng mundo 'di dapat kalimutan
na ang mga sanhi't dulot niyo'y karalitaan.

Karalitaang kung isipi'y krus na mabigat
ang isang simbolong hadlang sa mga pangarap.
Ang ibang maralita'y sa langit umaakyat
at ang ibang mariwasa ay sa lupa bumabagsak.

Ang langit sa mariwasa'y lubhang mahalaga,
kawangis ay ginto at perlas ng maharlika.
Ang mahirap naman, sa anuma'y kuntento na
basta't mabuhay lang na marangal at masaya.

Karalitaa'y pagsubok sa kaydaming tao,
para sa mayayama'y papasanin ng husto,
Sa mahihirap nama'y pampatatag ng puso
na mula sa kahapo't sa bukas patutungo.

Iba pang tagalog na tula ni Marvin:

• Dapit-hapon

Isang Malayang Taludturan

2011-08-04T10:28:00.001+08:00

Tula sa Tuluyan

Dulo
ni: Avon Adarna

Nag-aabang siya sa gilid
ng kiwal na kalsada,
Sa mga sandali ng buhay at pag-asa.
Hinihintay ang uugud-ugod
At ang mga ayaw nang tumugon
Sa pintig at tibok
At ang mga ayaw nang lumuklok
At tila nalimot
O sadyang madamot!

Nakaamba ang karit
Sa mapapapikit,
At siya'y mangangalabit
Isang saglit,
Wala na ang hininga,
Tila nabilaukan ang kaluluwa,
Lumulukso sa tuwa,
Ang lintek na luha -
Lumiligaya.

Alisto ka sa kanan
At kaliwang daraanan,
Mamamalayan na lamang
Na kaydali-dali
(Na kay-ikli-ikli)
Ng paglalakbay
Sa isang pikit-lumbay,
Wala ka nang buhay,
Wala ka nang malay.

Ilakbay sa daigdig
Ang pintig
Ng batas na nakasalig!
Ibaon ang galit
At pagkainggit
Mamuhay ng sapat!
Maging tapat!
Sa lahat!
Upang magluwat!

(Upang magluwat,)

Ang Filipino ay Wikang Panlahat, Ilaw at Lakas sa Tuwid na Landas

2011-07-31T17:14:00.002+08:00

Isang Tula Tungkol sa Wikang Filipino

Ano Ito?
ni: Avon Adarna

“Ito ay espada sa anumang laban,
Lakas na sa wari’y sigla ng tanggulan,
At ilaw sa dilim nitong kapanglawan,
At gabay sa landas na dapat tawiran.”

Ang bagay na ito’y makintab sa langis,
Pinatalas noong panahong mabilis
May bahid ng digma’t mga pagtitiis,
Hinasa sa dila pati na hinagpis.

Ginagamit ito ng mga pulubi,
Sa daang mabilis at nagmamadali,
Kanyang pangungusap sa nagdaang hari,
Ay tinumbasan lang ng mapait na ngiti!

Mistulang sandata ng kalalakihan
Sa ibig na liyag na kadalagahan,
Sa puhunang laway sa nililigawan,
May asawa na pala nang magkabistuhan.

Ito ri’y kalsada ng mga pinuno,
Upang makarating sa nais na p’westo
Ibinabayubay bago pa maupo,
Sa masa na hayok sa bagong gobyerno.

Mga patalastas sa mga programa,
Ginagamit ito na lakas at sigla;
Mungkahing produkto ng isang artista,
Ang tibay at galing ay hindi naman pala.

Inaabuso rin nitong kabataan,
Sa pagkakahaling sa lamiyerdahan
Gawaing proyekto sa paaralan,
Ang sasabihin pa na siyang dahilan.

Ginagamit nitong mga talipandas,
Upang makaiwas sa hatol ng batas,
Sa pagkakagumon sa yaman at lakas,
Ito ang paraan ng kanilang pagtakas.

Ginagasta niyong mga kumaliwa,
Sumigaw sa kalyeng umayaw sa lisya,
Ngunit itong sagot sa mga problema,
Hindi naman nila lubos na unawa.

Sa musikang tugtog nitong mga kwerdas,
Hindi na marinig ang tunay na lakas.
Tila nagwari lang na isang alamat,
Simula ay ingay, gulo itong wakas.

At sa pagtitiis ng kabayanihan,
Tila nalimutan ang pinanggalingan,
Sa marmol na bato sa Kamaynilaan,
Doon lang naukit ang pinaghirapan...

Tagalog na Tula para sa Buwan ng Wika 2011

Previous Posts:

• Original na Tagalog na Tula
• Dapit-hapon
• May Sukat at Tugma

Submitted Poem 1 - Dapit-hapon

2011-07-31T12:49:00.000+08:00

Mga Tagalog na Tula sa Pilipinas

Submission Corner

DAPIT-HAPON
ni: Marvin Ric Mendoza

Isang dapit-hapong madilim ang langit
Puno ng pangamba itong aking isip
Ang aking paligid ay lubhang tahimik
Habang si dilim ay marahang sumapit.

Sa dagat,si araw ay nagkulay pula
Simbolo ng paalam sa sinisinta
Ang liwanag sa bayan ay aalis na
Kung kaya nakahanda ang bawat isa.

Itong si gabi naman ay lalatag na
Tinatakpan ang pangit man o maganda
Kahit maaagap at masisipag pa
Pagdilim ng langit ay namamahinga.

Sa pagpinid ng bintana’y natanaw ko
Ang isang kandilang may sinisimbolo
Pinag-iisip ko at pinagtatanto
Kung ano ang halaga sa’king puso.

Madilim ang gabi’t walang maririnig
Maliban sa awit ng mga kuliglig
Ang simoy ng hangin ay sadyang kaylamig
Habang naghahatid ng magandang himig.

Habang hinihintay ang bukang-liwayway
Naisip ko na ang gabi ay kaytagal
Sa dilim ng gabi’y kayraming pinaslang
Pagpikit ng mata’y kayraming namatay.

Bukas ay sisikat na muli ang araw
Subalit tiyak kong ako’y mamamanglaw
Ang kandilang kagabi’y aking namasdan
May pag-asa pa bang muling matatanaw?

Sa silangan, si araw ay namumuhunan
At sa kanluran naman namamaalam
Kaya ang taong lupa ang sinibulan
Ay tiyak na may langit ding makakamtan.

Ang nais ko sana’y laging maliwanag
Laging ilaw ang mababanaag
Ako’y kurus na sa lupa’y humahalik
At lumuluhod sa gintong mga tinik.

Ang umagang kayganda’y muling lilipas
At isang dapit-hapon ‘yong mamamalas
Sa bagay na’to’y walang makaiiwas
‘pagkat ang Diyos natin ang s’yang nagsabatas.

Kaya iyong masdan itong aking palad
Ang kapalaran ko ay dito nakasulat
Ang karangalang sa aki’y igagawad
Marahil sa hukay ko na matatanggap.

Ang katawan ko’y sa lupa ililibing
Sakaling dapit-hapon sa’ki’y darating
Ngunit ang buhay ko’y magiging bituin
Na sa taas ng langit ay magniningning.

Ang lahat ng buhay ay may dapit-hapon
Ang mga gunita’y ating tinitipon
Kung sakaling bukas ay ‘di na babangon
Tayo’y kandilang sa kamay na ng Poon...

Note: Ang tagalog na tula ay inilathala sa pahintulot ng sumulat. Ito ay pinatunayan niyang kanyang original na tula at sinumang nagnanais na siya'y makontak, magpadala ng mensahe sa mendozamarvinric@yahoo.com.

Previous Submitted Entries:

Amelia Clapiz Tula Sa Tagalog

Orihinal na Tula sa Tagalog

2011-07-27T12:22:00.001+08:00

Mga Halimbawa Ng Mga Tula Na May Sukat At Tugma

Si Problema

Hindi malulunod sa alak o toma,
Magaling na swimmer itong si Problema,
Bumaha man ng Gin o The Bar at Grand Ma,
Tatawanan ka lang hanggang sa magsuka!

Pagkat dalubhasa’t napakatalino,
Sa paggawa niya ng sakit ng ulo,
Si Problema’y expert at lalo ngang tuso,
Kapag nakikitang luha’y tumutulo.

Dadagdagan pa ang kumplikasyon,
Kapag nanghina ka sa kunsumisyon,
Itong simpleng bagay na may isang tanong,
Magiging sandaa’t malala ang hantong!

Huwag mong lubusin na maipakita,
Ang kahinaan mo kung nakabulagta,
Bumangong mainam sa pagkakadapa,
At i-face to face mo - lintek na problema!

Maging wais naman sa nilalakaran,
Ilingap ang mata sa lubak na daan
Kung mayroon kang pinagdaraanan,
Huwag kang tumambay, dumaan ka lamang.

Ilingon ang ulo, idilat ang mata
At dapat hasain ang utak at sigla,
Upang ang problema’y agad na mawala,
Utak paganahin, kamay ay igawa!

• Dasal na Tagalog
• Halimbawa Ng Tulang Pag-Ibig
• Tula Tungkol sa Kalikasan

Halimbawa ng Tula na May Sukat at Tugma

2011-07-26T16:07:00.002+08:00

Ang tula ay may labindalawang (12) pantig sa bawat taludtod (line) at may apat na linya sa bawat saknong (stanza).

Sa Huling Silahis
ni: Avon Adarna

1
Inaabangan ko doon sa Kanluran,
Ang huling silahis ng katag-arawan,
Iginuguhit ko ang iyong pangalan,
Sa pinong buhangin ng dalampasigan.

2
Aking dinarama sa hanging habagat,
Mga alaala ng halik mo’t yakap,
Sa bahaw na simoy ng pagkakasangkap,
Ay nagdaang samyo ng iyong paglingap.

3
Ginugunam-gunam, sinasaklit-anyo,
Ang iyong larawan at mga pagsuyo,
Ang lungkot ng diwa’t dibdib pati puso,
Sa kutim na ulap nakikisiphayo!

4
Sa pag-aagawan ng araw at buwan,
At pagkapanalo nitong kadiliman
Ay nakikibaka ang kapighatian,
Sa pangungulila sa iyong pagpanaw.

5
Ang iyong pag-iral, hindi na babalik,
Kahit na ako’y lubos na tumangis
Pag-ibig na lamang na igting na nais
Ang makakapiling sa huling silahis.
-
Isang halimbawa ng tagalog na tula na may sukat at tugma na tungkol sa isang pag-ibig na sawi dahil sa kamatayan.

Iba Pang Uri ng Tula

• Tula na Pambata
• Pasalaysay Na Tula
• Tula sa Malayang Taludturan

Tagalog na Tula na Pambata

2011-07-15T19:29:00.001+08:00

Halimbawa ng Pambatang Tula

Kaygandang Pilipinas!

Sagana ang bansa sa likas na yaman,
Ang ginto at tanso ay nasa minahan,
Makakakuha rin, batong kumikinang
Sa gilid at gitna nitong kabundukan.

Magandang tanawin sa mga probinsiya,
Sa Luzon, Visayas at Mindanao nga,
Pumaitaas man o dakong ibaba,
Masisilayan mo’y tanawing may sigla.

Pagudpud sa Norte’y ipagmamalaki,
Ang mga turista ay mabibighani,
Itong Hundred Islands na nakawiwili,
Tiyak na ang lungkot, doon mapapawi.

Pumunta sa Baguio sa taas ng bundok,
Tiyak na kikilig sa lamig ng pook,
Sagada’t Banaue huwag mong ilimot
Sa mga bisita ay ating itampok.

Sa Boracay Island, tila paraiso,
Sa Cebu at Bohol, ikaw ay magtungo
At kung mapagod, huminga ng todo,
Kumain muna nga nitong halo-halo.

Humakbang ng konti, sa Mindanao naman
Itong Huluga Caves sa s’yudad ng Cagayan,
Sa Davao naroon ang tayog ng bayan,
Ang Bundok ng Apo na nagmamayabang.

Mga mamamayan, kulay kayumanggi,
Sa tuwina’y galak, sa iyo’y babati,
May halakhak pa’t luksong mga ngiti
Mga Filipino’y lagi nang mabunyi.

Kung kakain man ay aanyayahan,
Ang sinumang tao sa hapag-kainan,
Anumang pagkain ay pagsasaluhan,
May tuwang susubo asin man ang ulam.

Kahit na mahirap ang mga gawain,
Sa dagat, sa lupa at mga bukirin,
Tiyak matatapos bago pa dumilim
Mga Filipino’y hindi man dadaing.

Ang bansa kong ito, bansang Pilipinas,
Na ang katangia’y may sigla ng gilas,
Sinumang sasakop at magmamataas,
Aking itataboy, hinga ma’y mautas.

tags: filipino poems, tulang pambata

Tanaga na Tula ng mga Filipino – Mga Halimbawa

2011-07-14T12:12:00.001+08:00

Ang TANAGA ay isang uri o porma ng tagalog na tula na may 4 na taludtod, binubuo ng pitong pantig sa bawat taludtod at naglalaman ng isang diwa ng makata. Kadalasan itong nagtataglay ng isang tugmaan, a-a-a-a ngunit ang mga makabagong tanaga ngayon ay kakikitaan na rin ng mga tugma na inipitan - a-b-b-a, salitan - a-b-a-b at sunuran a-a-b-b. Ito ay bunga ng pagiging malikhain ng mga Filipino at pagnanais na mapaunlad at madagdagan ang ating mayaman nang kultura, sining at literatura.

Mga Halimbawa:

KURAKOT
Inumit na salapi
Walang makapagsabi
Kahit na piping saksi
Naitago na kasi.

MATAAS PA
Itong dumapong langaw
Sa tuktok ng kalabaw
Ay tiyak masisilaw,
Sa sikat na tinanaw.

SIPAG
Magsikhay ng mabuti
Sa araw man o gabi
Hindi mamumulubi
Magbubuhay na hari.

SLOW
Hindi ko rin malaman,
Hindi maunawaan
Mapurol kong isipan,
Isalang sa hasaan.

TUNAY NA YAMAN
Ako ay Filipino
Kulay tanso ng mundo
Ngunit tunay kong ginto
Nasa aking sentido.

PIPI
Puso ko’y sumisigaw
May bulong na mababaw,
Hindi naman lumitaw
Tinig ko’t alingawngaw!

FILIPINO
Tagalog ang wika ko
Hindi sikat sa mundo
Ngunit lantay at wasto
At dakilang totoo.

IKAW LANG
Dasal ko sa Bathala
Sana’y makapiling ka
Sa luha ko at dusa
Ikaw ang aking sigla.

PASLIT
Maraming mga bagay,
Na sadyang lumalatay,
Isip ko’y walang malay,
Sa hiwaga ng buhay?

TANAGA
Ang tanaga na tula
Ay sining at kultura
Tatak ng ating bansa
Hanggang wakas ng lupa.

Tula - Pabalik-balik

2011-07-13T10:55:00.001+08:00

(isang tagalog na tula sa Pilipinas tungkol sa mga alaala ng lumipas)

PABALIK-BALIK

DAPLIS ng panahong agad na DUMAPLIS,
BALIK ang kahapong kusang BUMABALIK,
HALIK ng lumipas sa diwa’y HUMALIK,
BAKIT nagtatanong kung saan at BAKIT?

SAAN nga nagmula at kung hanggang SAAN?
Ang TANONG na laging itsang KATANUNGAN,
MALALAMAN ko ba at IPAAALAM,
SAGOT na mailap, gustong KASAGUTAN?

NILALARO pa ng diwang MAPAGLARO,
TULIRONG paglimi na kahapo’y TULIRO,
TUMIMO sa dibdib ang sakit na TUMIMO,
NAGLABO ang luha sa matang MALABO!

NAGSISI ng lubos, ako ang SINISI,
NANGYARI sa buhay at bakit NANGYARI,
SAKSI itong langit at iba pang SAKSI,
KALAHATING buhay, kulang KALAHATI!

MALILIMOT ko ba’ng ibig KALIMUTAN,
MAWALA na sana gunitang KAWALAN
Nang MAPAHINGA na sa KAPAHINGAHAN
PAGAL na katawan, dustang KAPAGALAN!

HANGGANG sa makita itong huling HANGGAN,
MAGWAKAS ang lahat nitong KAWAKASAN
Ang DUSANG dumating at PINAGDUSAHAN,
MALIMOT nang husto’t ngayo’y MALIMUTAN!

Paglalarawan: halimbawa ng tagalog na tula na halos may magkaparehong salita sa una at huling bahagi ng isang taludtod, tula na may may (12) labindalawang pantig sa bawat taludtod.

Tula Tungkol sa Kalikasan

2011-07-08T11:56:00.001+08:00

Halimbawa ng tula tungkol sa kalikasan. (Example of Filipino Poem about nature.)

Kalikasan – Saan Ka Patungo?

Nakita ng buwan itong pagkasira,
Mundong kalisakasan ngayo’y giba-giba,
Ang puno – putol na, nagbuwal at lanta,
Ang tubig – marumi, lutang ang basura.

Nalungkot ang buwan sa nasasaksihan,
Lumuhang tahimik sa sulok ng damdam,
At nakipagluhaan sa poong Maylalang,
Pagkat ang tao rin ang may kasalanan.

Ang hanging sariwa, bilasa na ngayon,
Nasira ng usok na naglilimayon,
Malaking pabrika ng goma at gulong,
Sanhi na ginawa ng pagkakataon!

Ang dagat at lawa na nilalanguyan
Ng isda at pusit ay wala nang laman,
Namatay sa lason saka naglutangan,
Basurang maburak ang siyang dahilan!

Ang lupang mataba na bukid-sabana,
Saan ba napunta, nangaglayag na ba?
Ah hindi… naroon… mga mall na pala,
Ng ganid na tao sa yaman at pera.

Mga sapa at ilog sa Kamaynilaan,
Ginawa na ng tao na basurahan,
At kung dumating ang bagyo at ulan,
Hindi makakilos ang bahang punuan.

Ang tao rin itong lubos na dahilan,
Sa nasirang buti nitong kalikasan,
At darating bukas ang ganti ng buwan,
Uunat ang kamay ng Poong Lumalang!

tags: kalikasan tagalog poem

Isang Tagalog na Tula | Pasalaysay

2011-07-05T14:03:00.001+08:00

Halimbawa ng isang Tula na Pasalaysay

Buy and Sell ang Raket ni Itay

Buy and sell ng gamot
Ang trabaho ni Ama,
Na malilinawang
Siya’y tagabenta,
Bibili muna,
Sa isang Hapon
Sa Ermita
Ng gamot at mga bitamina,
At saka ibebenta,
Sa mga suki niya.

Buy and sell ng gamot,
Ang raket ni Ama,
At siya’y kumikita
Sa gawaing tagatinda,
Ngunit mag-ingat ka
Sa kanyang ibinebenta,
Lahat ng ito’y
peke naman pala.
Tubig lang at asukal
Lalagyan na ng timpla.

Buy and sell ng gamot
Ang gawain ni Ama
Nakukuha ng mura.
Sa Hapon na pabrika,
Binibili niya ng barya
Ilalako ng laksa
Sa utu-utong madla
Kahit peke naman pala,
Pati na kaha
hanggang karatula,

Buy and sell ng gamot
Ang ipinagyayabang ni Ama,
Ngunit ‘di naman alam
Nitong aking ina,
Nakatago sa kanya
Peke naman pala
Hindi nagtatanong,
Basta masaya na siya
Sa abot na intrega,
Na galing sa bulsa
Nitong mga tanga!

Buy and sell ng gamot,
Ang propesyon ni Ama,
Ito ang alam niya,
Na trabahong maganda
Ngunit ang ‘di alam ni Ama
May diabetes si Ina
At lihim din sa kanya
Nitong aking Ina
Na umiinom ng gamot
Na peke naman pala

Buy and sell ng gamot,
Ang career ni Ama,
Ngunit lihim lamang
Na peke naman pala
May lihim din naman
Itong aking Ina
Diabetes niya,
Tila lumalala
Sa pag-inom niya
Ng gamot na tinda ni Ama.

Buy and sell ng gamot
Ang gusto ni Ama,
Asukal na pula
Tubig at arina
Ang tanging laman
Ng gamot na tinda
Na ngayon ay kasama
Ng namatay kong Ina
Sa ataul na utang pa
Sa Hapon sa pabrika!

Tags:
tula filipino

Example ng Filipino Poem para sa Anak

2011-07-05T12:40:00.001+08:00

Halimbawa ng tula para sa anak na may kaarawan.

Maligayang Kaarawan, Anak!

Tanda ko pa noong ika'y ipanganak,
Akala ko'y anghel - sa lupa'y bumagsak,
Ngunit nang magbalik ang aking ulirat,
Ikaw pala iyan na nagbigay-galak!

Nagpapasalamat sa Diyos na tunay,
At ikaw ang anak, siyang ibinigay,
Wala ngang pagsidlan ng tuwang sumilay,
Mula ng lumabas ay naging makulay!

Lumaki kang bitbit itong kabaitan,
Maalalahani’t luksong kasipagan,
Kahit na nga tiyak na paminsan-minsan,
Ay may taglay-taglay bibong kakulitan!

Maligayang kaarawan ang sigaw kong bati!
Alagaan itong kalusugang mabuti,
Huwag pabayaan ang iyong sarili,
Upang magtagal pa ang buhay at liksi!

Kaya nga kailangan ang pagkain ng gulay,
Siyang bitamina’t sustansya ang alay,
Uminom din naman ng gatas na bigay,
At humigop nitong mainit na sabaw.

Wala akong ibang mahihiling sa iyo
Kundi maging isang tunay kang tao,
Huwag gumaya sa mga itim na oso,
Maging tuwid ka at maging totoo!

Mag-aral mabuti, huwag tatamad-tamad,
Ang gising - maaga at huwag na tumulad,
Sa bagal na kilos at kukupad-kupad,
Upang kinabukasan ay maging mapalad!

Maglalaho rin ang mga problema,
Na siyang hinaharap ng tulad mong bata,
Alamin ang sagot sa nakakatanda nga,
Kunin ang sagot sa ama at ina!

Sundin ang magulang na siyang nagpapala,
H’wag munang isipin ang pag-aasawa,
Darating din naman ang dalagang tama,
Upang mahalin ka ng tamang dakila!

Kung may suliranin sa buhay na ito
Huwag mag-atubiling kumuha ng payo,
Sa abot ng kamay at makakaya ko,
Tutulungan kita sa simula’t dulo!

Ilagi sa isip na narito kami,
Nagmamahal sa iyo sa araw at gabi,
Kapag nagkulang ka ng pera't salapi,
Iyon ang problema, walang masasabi!

Happy Birthday, Anak!

tags:
filipino poem

Isang Tula Para sa Bansa

2011-07-04T11:35:00.001+08:00

Example of Filipino Poem

Pilipinas, Ikaw ang Aking Bansa!

Sa hitik na yaman nitong kalikasan,
Hindi magugutom, hindi magkukulang,
Pilipinas na Ina ng mamamayan,
Kumakandili nga sa buting kandungan.

Ang mga dagat at kailaliman,
Saganang pagkai’t mga pangisdaan,
Ang lalim na tubig na asul sa kulay,
Ay siyang panlinis sa lupang katawan.

Ang mga gubat na hitik sa bunga,
Ipantawid-gutom sa kalam ng bituka,
At pati hayop sa dulong kabila,
Nabubusog din at nagpapakasawa!

Ang mga lupa sa luntiang bukid,
Ay pakikinabangan kapag pinilit,
Magtanim lamang ng palay o mais,
At tiyak na kakain sa oras ng gipit!

Mahalin ang bayan saan man pumunta,
Ipagtanggol nga sa dayuhang bansa,
Ibiging mabuti at maging malaya,
Upang manatili ang Inang dakila!

Ang tula ay alay sa mahal na bansa,
Pagkat ako’y kanyang inaaruga,
Itong Pilipinas na bayan ko’t ina,
Mamahalin ko saan man pumunta!

Tula in Filipino Tungkol sa Pag-ibig

2011-06-23T09:36:00.000+08:00

Halimbawa ng Isang Tagalog na Tula Tungkol sa Pag-ibig

Hayan sa Pag-ibig!

Heto’t iaanak, didito sa dibdib,
Ang dakila't wagas na luksong pag-ibig,
Pagsalitain dito ay hindi ang bibig,
Bagkus ay ang pusong may alsa ng pintig.

Patibukin lamang ang kanan, kaliwa,
Saka isalamin itong kaluluwa,
Kaya bang hamigin -- halakhak at tuwa,
Kung may palag namang dusa't mga luha?

Pigilin ang hinga't makipaghabulan,
Sa mundong ang ikot - singbilis ng orasan,
Lumaya sa gapos ng puso’t isipan,
Kadena'y kalagin, lipad sa ulapan!

Kung iyong nais at mamatamisin,
Iikid nang husto ang taling gupiling,
Ipakalimi mo nga ang lasang alipin,
Kagyat na manhik sa hagdang may kawing.

At huwag kalagin ang bugkos na tali,
Ikilos ang tula sa kislap ng gabi,
At kahit ang tali'y sagad na maigsi
May hihilahin kang pag-ibig sa bunyi!

'Pagkat iba't iba ang guhit ng palad,
Ang lubak mo'y baka hindi niya lubak,
Isiping mainam - hindi magkatulad,
Ang lubid ng iba'y iba ang may hawak!

Iyong makikita ang mga pagkaway,
Kung nakatingin ka sa dulo ng gabay,
At ang ngiti nila't mga bulay-bulay,
Hayaang ilibing ng layang mabuhay!

Tula Tungkol sa Paniniwala sa Pilipinas

2011-06-20T10:38:00.000+08:00

Paglalarawan: tula tungkol sa mga maling paniniwala na ipinamana ng mga dayuhan, tagalog na tula na parang isang kanta.

MERON-MERONG LINTA
Ni: Antonio Arnaldo
(isang tagalog na tula tungkol sa relihiyon)

Meron, merong linta,
Nagbahay sa bansa,
Dalang ebanghelyo,
Peke naman pala.

Pagdating nga dito,
Dumami na sila,
Hayan, hayan, hayan,
Parang magkukuta.

Meron, merong linta,
Wasak ang adhika,
Niloloko nito
Mga Pilipino.

Ulol na propeta,
Wala nang pag-asa
Kapos na magbago,
Kawawa lang tayo!

Meron, merong linta
Ginto ang ninasa
Gusto nila’y buto
Parang mga aso.

Walang kabusugan
Butas yata ang tiyan,
Kaya nanloloko,
Bundat at empatso!

Mensahe galing sa makata: Ginawa ko ang tula na ito upang magsilbing palaisipan sa kanila na hindi lahat ng mga isinusubong paniniwala at pananampalataya ng mga dayuhan ay tunay at walang bahid ng pananakop. Sana po ay maunawaan ninyo ang tagalog na tulang ito. Maraming salamat po. –antonioarnaldo1985

Tula Tungkol sa mga Bayani ng Lahi

2011-03-05T23:44:00.015+08:00

Paglalarawan: anyo ng tagalog na tula na malayang taludturan, tula sa tuluyan, poem about unsung heroes, Philippine poems.

NALIMOT NA KASAYSAYAN

Sa lapidang nilulumot

Ng mga bayani ng bayan,

Dito na lamang masisilayan,

Kanilang mga ipinaglaban.

Sa letra na lamang makikita

Ang kanilang mga simulain

Na hindi ipinagkait

Sa bayang marikit.

Sa malansang mukha na lamang,

Ng salapi natin masusumpungan,

Ang mga prinsipyo ng panahon

Na natabunan ng kahapon.

Sa lalim na lang ng mga ukab na semento

Ng simbahan at munisipyo,

Matatanaw ng malaya,

Ang kanilang pakikibaka.

Sa bibig ng hangal na historyan

Maririnig ng malamig

Ang kanilang mga tinig,

At ang mga daing at hinagpis.

Sa salitang namutawi

Ng mga lolo at lola,

Mababanaag ang liwayway

At ipinuhunang buhay.

Sa agos na lamang ng lumipas,

Makakapiling ng maigting

Ang kanilang pagpupunyagi

Na maituwid ang mali.

Sa rebultong nilulumot,

Doon na lamang umaamot

Ng kapiranggot na halaga

Upang maihambog doon kay Bathala!

Mensahe galing sa makata: mraming mga byani ang nkalimutan na ng mga kabataan. Kya gnawa k ang tula na ito. tnx. bye. -avonA!

Tagalog na Tula Tungkol sa Wowowee

2009-05-12T16:35:00.004+08:00

Tagalog na Tula Tungkol sa Wowowee

Hindi ko maunawaan
Ang mga iringan
Magkabilang hanggan
Ay nag-uungusan.

Wowowee sa katanghalian
Eat Bulaga ang kalaban
Laging parinigan
Walang katapusan.

Halakhak ng Kapuso
Laban sa pakulo
Walang sinasanto
Pati mga tao.

Sana’y matapos
Ang mga kaluskos
Para maayos
Ang daloy at agos.

Inaalay ko lagi
Ang aking sarili
Tulang tagalog
Na tungkol sa Wowowee.

Tagalog na Tula Tungkol sa Wowowee

TULA AT ERASERHEADS | FILIPINO POEM

2009-01-29T02:43:00.010+08:00

Pinoy Band Eraserheads - Filipino Treasure
Ni: Sarah M. Lee

Ang Eraserheads nga muling nagpaplano
Na ulitin itong naudlot na konsyerto,
Bitin nga sa concert lahat ng mga tao,
Si Ely Buendia sumakit ang puso!

Kahit ano pa ang gawin na paraan
Hindi na niya kaya sakit karamdaman,
Sa ospital na nakita, mga kaibigan,
Masakit ang nangyari, umiyak mga fans!

Favorite ko ang ERASERHEADS Band
Walang ibang tugtog na pumapainlanlang,
Music nila kasi’y aking nagustuhan,
May lalim ang lyrics kahit minus one!

May collection ako ng mga MP3
Lahat ng song nila’y aking itinatabi,
Pinatutugtog ko kahit na sa gabi,
Gising kapitbahay, pati na butiki.

Nai-download mo ba kanilang mga song?
Marami ang website na pwedeng magtipon
Song title ang siyang i-recall mo ngayon,
Hanapin ang FREE sa bawat station,

Inspiring talaga bawat song nila,
Ngingiti kahit nalulungkot ka,
May ligayang dulot sa bawat isa,
Download mo din sa puso ang member nila.

Si Marcus Adoro at Ely Buendia,
Raimund Marasigan, at Buddy Zabala,
Wala kang itatapon magagaling talaga,
Walang panama ang Yano, pati River Maya.

Download mo lahat wag kang magtatapon,
Mp3 at album at mga compilation,
Igawa mo ng folder na may dedication,
For sure you’ll be happy even if you’re alone.

Nariyan ang sikat na Huling El Bimbo,
Overdrive, Hard to Believe pati na Torpedo,
With A Smile, Kailan, Grounded ang GF Ko,
Maselang Bahaghari, Fruitcake at Pare Ko,

I-download mo na din Alapaap, Kailan,
Huwag Mo Nang Itanong, Magasin at Toyang,
Para sa Masa at Tuwing Umuulan,
Bogchi, Kaliwete, Ligaya, at Minsan.

Spoliarium At Maling Akala,
Sembreak, Julie Tear Yerky, Tindahan ni Aling Nena,
Pop Machine, Maskara, Palamig, Harana,
Ilan lamang sa song tiyak magaganda.

Sila’y nakilala Beatles of the Philippines,
Favorite ng adult pati lahat ng teens,
Kanta nilay nagdulot ng mga influence,
Original Pinoy Music sila nga itong the best.

Eraserhead’s songs pati mga album,
Laging patok dito, laging platinum,
Awards na marami at mga recognition,
Masasabi na sila ay sadyang mga icon.

Alay ko ang tula kong ito,
Sabihin man akong cornyng totoo,
Wala naman akong ibang iniidolo,
Eraserheads lang, una-unang sa gusto.

Ang Eraserheads ay Filipino band
Wala ngang kupas mataas na kalidad,
Huwag kang kokontra wala silang katulad,
Sa OPM industry : pinakasikat!

----

Paglalarawan: tula na tagalog, simpleng tula ng pinoy, filipino poem na may mababaw na salita.

TULA | PAANO SUMULAT NG TULA

2009-01-28T11:43:00.007+08:00

KATHANG ISIP NG MAKATA

Paano sumulat ng magandang tula?
Kailangan bang ito’y may sukat at tugma?
Paano kung hindi makita ng diwa?
Ang tula bang ginawa’y mababale-wala?

Ang aral na diwa’y dapat bang taglay
Ng tulang binanggit, kailangang makulay?
O sapat na rito na parang salaysay
At tila kwento lang ng mga bagay-bagay?

Kailangan bang ito’y magsilbing aral,
Sa bawat babasa’y dapat na umiral
Kaisipang dala ng tulang pedestal,
Lalagi bang wasto sa utak ng hangal?

Sa literatura, sining, panitikan,
Ang tula na yata ang pinakamainam
Pagkat nakasalig sa imbay ng paham,
Ipinanganganak sa sinapupunan.

Diwang nasa bungo ng makatang lingkod,
Ang siyang nagtulak, sa kanya’y nagbunsod,
Upang ang tula’y tumatak sa likod
Ng bawat babasa’y hindi na malimot.

Kung ako ang siyang tatanungin,
Hindi ko na yata pakaiisipin,
Ang tula ay tula: mababaw, malalim
Ito’y isang daan upang makagising.

Tula ay pumalag tuwang kalooban
Kahit sabihin pang siya’y kabataan,
Kung buhat naman sa loob at isipan,
‘Di na dapat isipin ang kahulugan.

Nasa utak na ng nagmamay-ari,
Kung ano'ng ibig itukoy sa sinabi,
Ang tula na inukit ay alay sa sarili
Pagkat maaaring lumipad sandali.

Maisisigaw mo tinig ng hininga,
Sa tula ay hari ikaw na makata,
Lalaruin ang buwan pati mga tala
Pwedeng makasiping lahat ng artista.

Magiging daan din sa paglalakbay
Talata ng tula ay walang hanggang gabay,
Pangarap na yaman naisasabuhay
Lungkot mawawala, kahit nalulumbay.

Sa pamamagitan ng aking mga sulat,
Nailalabas ko ang pintig sa lahat,
Hindi man nga ito buting isiwalat,
Tutula’t tutula kahit maging malat.

Ang lahat ng tula mayroong layunin
Ito’y ibubunyag matapos hagurin,
Ilalapat ang tono kahit na nga bitin,
Itula mo na lang ang ibig sabihin.

Kung napipilipit dilang baluktot,
Hayaan na lamang ang pagkakalukot,
Ang nais nga lamang ay maipulupot,
Ang tula sa mundo’y ating ihandog.

Ano pang iyong itinutunganga?
Walang patlang dito ang nakatulala,
Gumawa ka, bilis, tumula nang tumula,
Huwag mong isipin ang anumang hiya!

( Isang Tula Para sa mga Makata ng Pilipinas )

TULA NA TUNGKOL SA PAGKAKAIBIGAN

2009-01-24T10:16:00.007+08:00

FRIENDSTER ACCOUNT ---- KAIBIGAN-GSTER?

Nagtatalo ang isip pati kalooban,
Hindi ko maisip hindi ko malaman,
Alin ang mas sikat sa mga kabataan
Sa social networking na pangkaibigan?

May Friendster na milyon itong mga member,
Sila raw ang una, maraming follower,
Hindi daw tataob sa dami ng user,
May Freindster account din kasi pati mother at father.

Ang Myspace naman, walang pagkapanis,
Sumikat na rin nga sa network na business,
Member naman nila sobra-sobra, labis-labis,
Mas marami pa daw sa butil ng mais.

Mayroong isa pa na social networking,
Facebook naman kung siya ay ituring,
Talo daw ang Friendster at pagkagaling-galing,
Wala kang masabi sa dami ng haling.

Friendly network site ang itatawag mo ,
Na ang layunin nga’y pag-isahin ang mundo,
Pwedeng makilala kahit Amerikano
Basta't may account, magiging friend kayo.

At kailangang humanap ng friendster skin:
Template at background, ibig kong sabihin,
Mag browse sa internet at tumingin-tingin,
I-paste mo ang code hanggang magkaduling-duling!

Ang Friendster account mo’y isipin mong bahay
Na dapat malinis maganda’t makulay,
Kasing ganda dapat ng lugar na Boracay,
Walang bibisita kung nakakaumay.

At sa pagpunta nga ng iyong amiga,
Friendster skin mo’y kanyang makikita,
Siya’y gaganahan sa pag-aanalisa,
At siya sigurado may comment na maganda!

Pwede ring i up-load picture na naka smile
Lahat ng picture lahat ng may style,
Sa Friendster lahat pwedeng mong ilagay
Nakanguso, nakadila pati naka peace sign!

Mag register na kung hindi pa kasali,
O log-in na kayo hanggang sa mawili,
Enter lang ang e-mail ang 'yong identity,
Password ang katapat, maaari nang maging friendly.

Pero bago ka humataw nitong invitation,
May ilang bagay kang dapat maging layon,
Kung hindi kakilala'y dapat maging baon,
Ingatan ang sarili sa lahat ng panahon!

Pagkat sa alin mang bagay na mabuti,
May dulot na sama, aking masasabi,
Kailangang pairalin ang internet safety,
Sa Friendster nagkalat may hangaring marumi.

Tuwing sa oras na may mag-aanyaya;
Eyeball daw kayo sa sulok ng Trinoma,
Isipin mong lagi sa pakikipagkita
Ang pagiging handa sa anumang sakuna.

Pagkat marami nga ang may samang balak,
Akala mo’y friendly yun pala’y talamak,
Baka kung saan, kaniya kang itulak,
Hala! Nagising kang hubo ka na’t hubad!

Dito na papasok ang matibay na pader,
Na ang friend mo pala ay Kaibigan-gster,
Pinaikot lang pala ang lahat sa Friendster,
Siya naman pala'y rapist at holdaper!

Pero sa social network na uring ganito
May ligaya din naman at saka konsuwelo
Ang tuwa at galak sa loob ng tao
Ay ang dumami pa ang mga amigo.

Marami na rin ang nagkatuluyan
Sa Friendster website ay naging magkatipan,
Nauwi sa ligawan hanggang sa kasalan
Ang Friendster ang siyang naging dahilan.

Nagbunga rin naman kanilang relasyon,
Ang naging mag-asawa ay Pinay at Hapon,
Kaya nagsilang --- “a baby was born!”
Friendsterick ang name alam n’yo na ang reason!

TAGALOG TULA SA PAGKAKAIBIGAN

MAKABAGONG TULA ALAY SA BORACAY

2009-01-21T07:00:00.010+08:00

Boracay Island - The Paradise Island

Boracay Island ay isang paraiso,
Tanyag sa Japanese, Chinese, Amerikano,
Pumupunta rin pati Aprikano
Hanap ay Boracay kahit mga Negro.

Sumikat ang Pinoy at ang Pilipinas
Sa tourism ay tanyag at pumapagaspas,
Pagkat ang imahe ay tila sa hiyas,
Sa krisis at hirap parang ika'y lunas!

Maimbay ang alon sa Boracay Island,
Humihintong kusa sa dulo ng white sand,
Sa gitna ng dagat, ang dalampasigan
Naukit ang lihim nitong kagandahan.

Ang bato-balani sa mga turista,
Laging nadadaig, parang hinihila,
Sila’y naaakit sa taglay mong ganda,
Parang sa dalaga, kinis porselana.

Cottages sa beach, resort na may hotel,
Sa Boracay makikita pati mga model,
Naka two-piece-bikini kahit na may muscle,
Lulubog sa ilalim suot ang snorkel.

Kung sa umaga’y kayganda mong dilag,
Ikaw na Boracay, laging naglalayag,
Sa gabi naman, ikaw batong buhay,
Hindi ka natutulog, hindi naglulubay.

May beerhouse, nightclub, saka mga disco,
Boracay ay libang na nakalalango,
Ang mga dayuhan, mga bisita mo,
Sa lalim ng gabi’y lasing sigurado.

Ang mga bugaw, may sariling diskarte
Mayro’n silang offer, hindi ka tatanggi
Mura lang ang aliw, kung nais ng lalaki
Ingat ka lang Pare, baka makuryente.

Kaya pumunta ka dito sa Boracay,
Walang pasubaling masaya ang buhay,
Ngiti sa pag-uwi lubusan mong taglay,
Kapalit ng pera mong inutang sa Bumbay!

BORACAY - PARAISONG BUHAY!

TULA TUNGKOL SA ABORSYON

2009-01-09T06:32:00.003+08:00

SILANG MGA WALANG DIYOS
ni: Amelia Clapiz
(tula sa tagalog na tungkol sa abortion)

Siya’y nagsimulang dugo sa balakang,
Sa simula’y walang malay,
Walang hugis, walang kulay.

Siya’y sanhi ng isang palag ng kasamaan.
Siya’y bunga ng mga kasidhian
Ng mga pag-aalab, ng mga kapusukan.

Lumangoy siya sa sinapupunan ng ina.
Nagkaroon ng buhay, umamot ng hininga,
Biniyayaan ng dakilang Bathala.

Ngunit narito na naman ang imbay ng hangal
Ang puso’y nalupig ng bigong kasal.
Sarili ang isinalang, ibinalibag ang diwang banal

Hinatulan siya sa dilim na pusikit.
Siya’y walang puwang sa daigdig,
Sa impiyerno man o sa langit.

Siya’y sinikwat, niligis inukit, ,
Winasak, dinurog, sinaklit,
Siya’y kinarit, Hindi nakakapit!

Humantong sa ilalim, doon sa kawalan!
Hindi nila siya binigyan ng kalayaan
Ipinagkait ang pintig ng damang kabutihan!

Mensahe galing sa makata: Abortion is illegal in the Philippines. The Revised Penal Code (Act No. 3815, Article 256-259) defines the various ways and means by which abortion is committed, by whom, and their corresponding penalties: reclusion temporal, prison mayor, and prision correccional .

The penalties cover:

any one who causes intentional abortion by using violence on the person of the pregnant woman; or, if he acts without violence, acts without the consent of the woman;
any person who causes unintentional abortion by violence;
abortion practiced by the woman herself or by her parents;
abortion practiced by a physician or midwife dispensing of abortive;
any pharmacist who, without the proper prescription from a physician, dispenses of abortive.
While it makes abortion punishable, the law has been hard to apply because no aggrieved party or complainant comes to the courts to file a criminal case on an abortion.

But just because the law is hardly applied does not mean that crime is less offensive. It only indicates that the right to life of the unborn is an issue that Philippine society, in general, has refused to confront.

excerpt from: Pro-Life Philippines
Amelia Clapiz

TULANG TUNGKOL SA RELASYON

2009-01-09T06:28:00.001+08:00

UNDER DE SAYA

Hatinggabi na ng ikaw ay dumating,
Lagabag ng pinto'ng sa aki'y gumising,
Suray ng aninong naglaro sa dilim,
Tanda lamang giliw na ikaw ay lasing!

Bigla ang kabang pumasok sa diwa,
Batid ko na hirang ang mangyayaring kusa,
Kumawalang ungol sa iyong hininga,
Hudyat nito'y ako na naman ang kawawa.

Suntok mo sa aki'y di na alintana,
Pagkat pagsamo ko'y wala ring halaga.
Sige lamang... sige, sapak mo at sipa,
Maghihintay ako hanggang sa magsawa!

Wala ka na bang natitirang bait,
Awa't pagmamahal wala rin sa dibdib,
Ang kaluluwa ba'y sadyang mapanlupig
Di ka naaawa, sagad ka sa lupit!

Bukas ng umaga'y maghihilom din naman,
Sugat, mga galos, pasa sa katawan,
Bukas ng umaga'y mawawala rin naman,
Ang init ng alak sa iyong katawan.

Ang akin lamang ipinakikiusap,
Baka nawawala sa iyong ulirat,
Ako pa rin siyang naghaharing-sukat
AKO ANG LALAKI BAKIT NAGHIHIRAP?

HALIMBAWA NG TULANG TAGALOG NG ISANG NAMATAY

2009-01-09T06:27:00.003+08:00

AKO PALA ITONG ILILIBING NINYO!

Ang nilalang na sumakabilang buhay
Saan paroroon at saan hihimlay?
Ang kaluluwa bang maitim ang kulay
Sa dagat ng apoy ang hantong na tunay?

At ang kaluluwa ng buting nilalang,
Pinto ba ng langit ang bukas na daan?
Sino ang hahatol, magbibigay puwang?
AMA ba o ANAK ang dito'y hihirang?

Nagising akong puno ng pag-asa,
Dumilat ang tingin sa ganda ng umaga,
Napagwari ko ding kaygaan ng umpisa,
Igting ng paligid ang bumulaga!

Ngunit ano itong nangyari sa amin?
Magulo ang tao, parang sa may piging,
Aba at nabigla, nagkaduling-duling,
Ako pala itong inyong ililibing!

(halimbawa ng tulang tagalog ng isang namatay)

ISANG TULA SA TAGALOG

2009-01-09T06:24:00.002+08:00

NASAAN KA O HARING ANTOK?

Kung nakatutunaw ang titig at tingin,
Natunaw na sana itong puting dingding,
Kung nakapupunit, lagkit ng paningin,
Ang kisameng ito'y punit-punit na rin!

Ang tangi kong tanong sa puso't isipan,
Kailan darating pilak mong kariktan?
Tigib ng pasakit itong katauhan,
Uhaw sa piling mo pati kapalaran!

Nakikiramay pa, nakikisiphayo,
Panahon sa labas, sa pusod ng mundo,
Ang ugong ng ulan ay nakikipaglaro,
Sa kulog at kidlat na 'di nagbibiro!

Ako'y nananangis kay Bathalang ganap
Na masilayan na ang anghel na hangad,
Ako'y inalipin ng kahabag-habag,
Ang ukab ng talim, dito nakalagmak!

Bakit nagkakait abang kapalaran,
Dugo't mga luha laging nakaabang,
Ang paghihintay ko'y ibig nang sukuan,
Alindog mo't pala ay di matagpuan!

Saan ka nagpunta Hari kong antok?
Hindi mo ba ibig na ako ay itampok?
Hindi mo dalawin ang abang napapagod?
Hindi tuloy ako makaamot ng tulog!

KALOKOHAN NG MAKATA

2009-01-09T06:18:00.003+08:00

NAGLADLAD KA NA, SINTA!

Ang pipi kong dibdib, natigib ng luha,
Matapos marinig ang iyong winika,
Tila sinakluban ng langit at lupa,
Ang diwa ko'y kubkob ng pagdaralita.

Nagtagpo nga tayong wala sa panahon,
Inibig mo akong parang panginoon,
Di mo alintana ang aking kahapon,
Gayon din naman ako sa iyo ay gumon!

"Ikaw lamang sinta!" iyo pang tinuran.
Sa aking gunita'y di na mapaparam,
Sa laot ng isip ay nakasalansan
Pagkat ako nama'y gayon din naman hirang!

Ngunit nagbago kang sira ang pangako,
Wala kang pag-awa sa aking pagsamo,
Akala ko naman ika'y nagbibiro,
Ang sinabi mo pala'y malinaw na wasto.

Kung siya mong ibig na ako'y magdusa,
Walang magagawa , wala nga, wala nga,
Naniniwala na at walang magagawa
Ikaw nga ay isang naglalanding bakla!

TAGALOG NA TULA | PAG-IBIG

2009-01-09T05:33:00.004+08:00

Tula Tungkol sa Pag-ibig

"Ang pag-ibig ay mapagpahinuhod, at magandang loob; ang pag-ibig ay hindi nananaghili; ang pag-ibig ay hindi nagmamapuri, hindi mapagpalalo
Hindi nag-uugaling mahalay, hindi hinahanap ang kaniyang sarili, hindi nayayamot, hindi inaalumana ang masama;
Hindi nagagalak sa kalikuan, kundi nakikigalak sa katotohanan;
Lahat ay binabata, lahat ay pinaniniwalaan, lahat ay inaasahan, lahat ay tinitiis...."

PUGAD NG PAG-IBIG

Pag-ibig anila'y bulag ang kahambing,
Hindi nakakikilala ng pangit at matsing,
At kahit pa nga magdildil ng asin,
Duling na sa gutom, maligaya pa rin!

Ganyan bang pag-ibig... martir at dakila?
Sa wari'y bayani't sundalo ng digma,
Sugatan ma't lumpo, lalaban ng kusa
Ipakikibaka bansang sinisinta.

Walang pasubaling ganyan ang katulad
Ng magkasintahang nasa isang pugad,
Hindi papipigil harangan man ng sibat,
Pagkat alipin na ng pusong bumihag!

Ngunit kung minsan nga'y iba ang pag-ibig,
Humugis na talim - gahaman at ganid,
Kumikitil ito, sa buhay pasakit,
Luluha ka lamang ng dugo at putik!

At magkaminsan pa'y hatid nito'y sama,
Kasalanan ang siyang dala nitong bunga,
Buhay ng pag-ibig wala ngang kapara
Salimuot ng gulo, magulong dakila!

"Ngayon ang tatlong ito ay mananatili, ang pananampalataya, ang pag-asa at ang pag-ibig. Ngunit ang pinakadakila sa tatlong ito ay ang pag-ibig. "

1 Corinto 13:4

Tulang tagalog na iniaalay sa lahat ng mga umiibig!

ISANG TULA PARA SA MASA

2009-01-09T00:52:00.005+08:00

Ang politika at politiko dito sa ating bansa ay isang institusyong nangangailangan ng masusing pagbabago hindi lamang sa bulok na sistemang nakakubkob dito kundi sa nakaririnding kasamaan na lumalaganap. Narito ang isang tula sa tagalog na tungkol sa mga pulitiko at sa politika ng bansang Pilipinas.

Ang orihinal na tula ay maging inspirasyon sana sa lahat upang magsalita at lumaban sa oras na pakiramdam natin ay tinatapakan tayo ng mga higanteng lider ng bansa.

MGA HAYOP SA PILIPINAS

Labing-apat na hayop, nagtumaas, nagtumayog,

Nagharing uri sa pedestal at bantayog,

Niyukuran, tiningala, sinamba't sinunod,

Yaman, kapangyarihan ang sa kanila’y bumusog.

Masang alipin ‘di na alam kung saan susuling,

Pumurol na ang tabak, natunaw sa libing.

Ang ganti sa hagupit ng hayop na kapiling

Mga piping hiyaw, mga luhang haling!

Tangả ang sisira sa kalawang na bakal,

Yuyurakan ka kahit na luhuran,

Timawang hayop sa gutom ay basal,

Walang pagkilala kay Bathala at dasal!

Sa hukom ng Hari doon ang higanti,

Pagsibol ng araw sa dilim ng gabi,

Mga hayop na busog at mga nakangisi,

Sa apoy ng impiyerno, hahantong sa huli!

Maraming lider ng bansa ang nagtamasa ng katakut-takot na yaman na ninakaw sa kaban ng bayan. Mga yaman ng bansang hindi napakinabangan ng nakararaming mga mahihirap. Ang masang Pilipino'y isang pulubing nakatanghod sa isang panginoong hindi marunong maawa. Hindi nakauunawa ng higit na kahulugan ng salitang pag-ibig.

Ipagwalang-bahala man ito ng mga nakapaligid, umaasa akong sa mga huling araw at sa araw ng paghuhukom ay haharap sila sa tunay na Panginoon na maraming daing at pagsisisi ngunit hindi NIYA sila pakikinggan.

Ang tulang tagalog na ito ay inihahandog sa mga Pilipinong pasan ang hirap ng buhay.

TULA TUNGKOL SA PAGSILANG

2009-01-09T00:10:00.007+08:00

Ang pagsilang ng isang sanggol buhat sa sinapupunan ng isang ina ay isang dahilan na hindi maikakailang tayo ay may isang umiiral na makapangyarihang Diyos sa lahat.

Ang tulang tagalog na ito ay ginawa ko upang maipakita na tayo ay nanggaling sa Diyos Amang nasa langit. Katulong niya sa ating pag-iral ang ating ama at ina na sa simula at sapul ay nag-aruga sa atin hanggang tayo ay makatuntong sa sarili nating mga paa.

Tunghayan natin ang tulang tagalog na may pamagat na:

PAGSILANG

Ang punlang sumibol sa sinapupunan,
Ay ama at ina ang doo’y lumalang,
Pagka’t nakalutang ang pagmamahalan,
Sa kanilang puso bilang magkatipan.

Mahiwaga raw itong buhay ng tao,
Mula sa pagsilang hanggang sa pagyao,
Ang lihim ba nito’y walang pagtatalo
Sa Diyos nakabatay, wala sa kung sino?

Ang Diyos na lumikha ng langit at lupa,
Tumulong rin ba sa ama at ina?
Nagbigay ng pintig sa puso’t hininga,
Upang mabuhay pati kaluluwa?

Pasalamatan natin ng pagpapasakop
Ang Diyos na Bathalang sa ati’y kumupkop,
Ilagay mo sa diwa ang bawat pagsinop
Sambahin mo sa araw pati sa paglubog!

Hindi ka uusbong sa mundong ibabaw,
Kung ang tanging dahilan ay mga magulang,
Gumawa man sila sa gabi at araw,
Hindi mabubuo, hindi ka lilitaw!

Ang tanging dahilan na ika’y nabuhay,
Sa Diyos nakasalig, doon nakabatay,
Pasalamatan nga, papurihang makulay,
Diyos na dakila, laging dumadamay!

Kung tayo’y nabuo sa pamamagitan ng Lumikha, maaari din nating pasalamatan ang ating mga magulang na naging sandata ng Diyos upang tayong lahat ay umiral sa daigdig.

Ang tula na tagalog ay alay para sa mga kabataan at mga magulang na ama o ina.

TULA NA TAGALOG PARA SA DIYOS AMA

2009-01-08T23:23:00.011+08:00

Narito ang isang panalangin sa pamamagitan ng isang tulang tagalog. Ang Diyos ang ating sandigan at pinagkukunan natin ng lakas, kalusugan at buhay sa araw-araw. Sa kaniya nanggaling ang lahat ng mga bagay na may buhay at walang buhay. Sa buong isang taon na ibinigay niya sa atin upang tayong kaniyang mga nilalang ay gumawa ng kaniyang mga kautusan ay nararapat lamang na ating pasalamatan upang sa darating na panibagong taon ay maging maluwalhati at makabuluhan para sa lahat. "This is a Christian Poem dedicated to God Almighty inspired by the blessings He had given us for the past years. Christian poetry is one of the most popular types of poetry, providing great pleasure to many people. Poetry with the powerful theme of Christianity often touches the emotions of the readers, and people are able to personally relate to many of the words and lyrics of such poetry."

AMA NAMING BANAL

(Christian Poem for God the Father)

Dakilang Ama sa ikapitong langit,
Salamat sa buong isang taong marikit,
Puno man ng pagsubok unos na malupit,
Matibay pa rin ang aming pagkapit!

Ikaw Ama namin, ang aming sandalan
Alam kong hindi kami pababayaan,
Kami ma’y laging balot ng kasalanan,
Ibigay mo pa rin ang kapatawaran.

Ang aming kapwa na nagkasala
Sa amin ng lubos ay pinatawad na,
Nagsusumamong ganun din naman sana
Ang sa amin ay igawad, parang awa mo na!

Kung naging suwail kaming mga anak
Nakahandang ilahad itong mga palad
Paluin mo kami ng pamalong hawak,
Upang magtanda nga at kami’y tumatag.

Tiklop-tuhod Ama kaming maliliit
Sinasamba ka naming walang pagsusulit
Wala nga kaming itulak-ikabig
Sa banal mong pangalan kami’y nakasalig!

At sa oras na ito Diyos naming banal
Inilalapit din namin itong mga hangal
Natutulog na puso, diwa na mabagal
Sakupin mo sana ng kayong balabal.

Hanggang dito Ama ang aming pagtangis
Ika’y ay aming iniibig ng labis!
Ilayo sa disgrasya, kabutihan ang ibihis
Gabayan mo kami sa mundong mabilis

Idinadalangin namin ang lahat ng ito
Sa pangalang ng ‘yong Anak na si Kristo
Tagapagligtas namin sa daigdig na ito,
Upang ipag-adya sa lupit ng imp'yerno!

Amen.
---

Mensahe ng makata: Ang tulang tagalog na tungkol sa Diyos Ama ay iniaalay sa lahat ng mamamayang Pilipino sa bansang Pilipinas. Mabuhay!

Paglalarawan: christian poem, religious poem, tula in filipino, philippine poem.

TUNGKOL DITO

2009-01-02T23:10:00.014+08:00

Maraming salamat sa pagbisita sa blog na MGA TAGALOG NA TULA SA PILIPINAS. Ang blog na ito ay naglalaman ng koleksyon ng mga orihinal na tula sa tagalog at mga halimbawa ng mga tagalog na tula na tungkol sa iba't ibang pangyayari, karanasan, damdamin, kaisipan at opinyon ng mga sumulat sa iba't ibang larangan at kaurian ng mga may buhay at walang buhay na nilalang at kaniyang kapaligiran. Ang mga ito'y pawang kathang-isip lamang at anumang pagkakatulad sa mga nabanggit na mga bagay, pangyayari, tao, lugar o hayop at mga kagaya nito, dito sa ibabaw ng mundo o sa kalaliman ng karagatan, sa loob o labas man ng daigdig ay hindi sinasadya at hindi dapat seryosohin ng bumabasa.

Gayunpaman, ang lahat ng mga nilalaman nito, tula man, sanaysay o maikling kuwento ay pag-aari ng sumulat at hindi maaaring gayahin, gamitin, kopyahin o ilimbag ng paulit-ulit, sa ano mang porma at disayn, kabuuan man o bahagi lamang nito ng walang pahintulot sa may-ari.

Para sa mga suhestiyon, komento o anumang katanungan at hangarin tungkol dito, maaaring mag-iwan ng kumento.

Maaari rin kayong magpadala ng inyong sarili at orihinal na tagalog na tula upang mailathala dito. Ipadala sa e-mail addresss na nasa itaas kasama ang inyong pangalan o alyas at hintayin ang mensahe kung kailan lalabas ang inyong ipinadala. Maligayang paggawa ng tula.

Iniaalay ng may-akda ang MGA TAGALOG NA TULA SA PILIPINAS sa mga kabataan at nilalang na nagnanais na mapagyaman ang Tulang Filipino ng makabagong panahon! Maraming salamat at maligayang pagbabasa!