Mabuhay! Welcome to "Mga Tagalog na Tula sa Pilipinas | Filipino Poems in the Philippines! Here in this blog, you will find a collection of original tagalog poems. Please, feel free to browse at our archive. Thank you! -avonadarna
Maraming salamat sa pagbisita sa blog na MGA TAGALOG NA TULA SA PILIPINAS. Ang blog na ito ay naglalaman ng mga koleksyon ng mga tagalog na tula na (maaaring) tumutugma sa diwa, damdamin at panlasa ng literatura at panitikan ng mga makabagong Pilipino dito sa bansang Pilipinas.

Ang PANITIKAN at LITERATURA ng PILIPINO sa larangan ng TULA ay ang pinakamasining at malikhain na paglalapat ng mga kalipunan o grupo ng mga salita sa wikang Tagalog. Ito ay naglalarawan ng isang diwang (maaaring) naglalaro sa isipan ng sumulat.

Ang may-akda ng Mga Tagalog na Tula sa Pilipinas ay nilalang na nagnanais maghabi ng mga salita sa tagalog at isalaysay ang mga kuwento sa pamamagitan ng mga linyang may tugma at sukat (o sa malayang taludturan din) na gaya ng isang tula!

Mabuhay ang Tagalog na Tula sa Pilipinas at ang mga makatang Pilipino!

Tula Para kay Tatay

Halimbawa ng Tulang Tagalog para kay Tatay

Malaki ang utang na loob natin sa ating mga ama!


Ang Tatay Ko
ni: Avon Adarna

Malakas ang hilik kapag natutulog,
Na parang may g’yera at bombang sumabog,
Kapag umiinom ng kapeng hinigop,
Tiyak na kasabay ang lakas na tunog.

Sa kanyang salita’y nag-iibang titik,
Ang “evap” na gatas ay “ebaf” ang dinig,
Ang wikang “trabaho” kung itulak-ikabig,
“Tarbaho” ang siyang lalabas sa bibig!

Ngunit sa hinagap ng tuwid na diwa,
Ay mababanaag na siya’y dakila,
Kapag may sisibat o kaya ay tudla,
Tiyak na haharang upang masagip ka!

Nagtitiis siya na hindi kumain,
Kapag ang anak ay may bibilhin,
At sakripisyo rin - sa bisyo ay bitin,
Upang ang pamilya ay may pangkain!

Kahit na ano pa sa daigdig na ito,
Walang pasubaling ako ay saludo,
Pinagsumikapang maigapang ako
Nang kinabukasan ay maging plantsado!

-mga tagalog na tula

Maligayang Araw ng mga Ama!

Maiksing Tula sa Malayang Taludturan

Tula sa Filipino na Walang Sukat 

"Maaari pang magbago ang tao kahit gaano siya kasama."

Itapon at Pagsisihan ang mga Kasalanan
Bukas ko Isa-isang Itatapon
ni: Avon Adarna

Bukas ko isa-isang itatapon
Ang mga multo ng kahapon,
Isasapi ko sa mga alon,
Ang luha kong bumabalong.

Harinawang magtagumpay
Sa pag-iiba nitong lakbay,
Kasihan sana ang saysay,
Nang mawala itong lumbay!

Ang dumi kong kalooban,
Ilalaglag ko sa daan,
Pagbalik ko sa hangganan,
Iba na akong nilalang!

At sa puti ng alapaap,
Harinawang tumalab,
At makita ang kislap,
Nitong Poong maliyag!

---mga tagalog na tula sa Pilipinas

Kahulugan ng mga Salita:

kasihan - kampihan, samahan, alalayan, sapian.

Halimbawa:
Ako sana ay kasihan ng Poong Maykapal sa aking gawain.
Kinasihan sila ng Espiritu Santo sa kanilang paglalakbay.

--------------------------------------------

Related Search:

• malayang taludtod
• walang sukat
• may tugma, walang sukat ang pantig

Iba Pang Tula:

Isang Tula sa Tagalog 

Photo Credit